Hindi Kailanman Huli Para Sa Edukasyon : Kwento ni Nanay Marites

Ang pagtatapos sa Alternative Learning System (ALS) at Senior High School (SHS) sa ilalim ng Open High School Program ay nagsilbing daan para sa mas malawak na oportunidad para kay Nanay Marites Camarillo. Ang minsang pangarap lamang na makatuntong sa kolehiyo ay naging realidad matapos niyang sumubok, kasama ng libo-libong aplikante, sa NVSU College Admission Test (NCAT)—at matagumpay niya itong nalampasan.

Muling naging usap-usapan sa social media si Nanay Marites nang maitampok siya sa Facebook pages ng The University Gazette at Nueva Vizcaya State University (NVSU). Ngunit hindi siya naging tampok bilang empleyado ng unibersidad, o bilang magulang at tagapag-alaga ng isang estudyante sa unang araw ng pasukan. Sa halip, siya mismo ang isa sa mga bagong mag-aaral na pumasok sa unibersidad bilang freshman sa kursong Bachelor of Arts in Political Science.

Bago pa man siya makapasok sa kolehiyo, hinangaan na si Nanay Marites ng marami dahil sa kanyang pambihirang tagumpay sa pag-aaral. Sa edad na 56, nagtapos siya ng Senior High School na may karangalang With Honors, isang tagumpay na nagpapatunay na hindi hadlang ang edad upang makamit ang akademikong kahusayan.

Ang kanyang kwento ay inspirasyon hindi lamang sa mga kapwa niya nasa hustong gulang na nagnanais muling mag-aral, kundi maging sa mga kabataan na minsang pinanghihinaan ng loob sa pagharap sa mga hamon ng edukasyon.

Sa panayam ng The University Gazette, ibinahagi ni Nanay Marites ang kanyang matibay na paniniwala na ang edukasyon ay isang mahalagang susi sa pag-angat ng buhay.

“Dito ko po napili sa NVSU na ipagpatuloy ang aking pag-aaral sa kolehiyo. Bilang isang simpleng mamamayan, nais ko pong maging hakbang ito tungo sa kaunlaran. Malaking tulong din po ito sa akin bilang estudyante dahil malapit lamang ito sa aming bahay at pamayanan.”

Sa likod ng kanyang mga tagumpay ay ang di-matatawarang determinasyon, tiyaga, at pananampalataya sa sariling kakayahan. Para kay Nanay Marites, ang kahirapan, edad, at mga pagsubok sa buhay ay hindi kailanman naging sapat na dahilan upang isuko ang kanyang mga pangarap.

Ang kanyang paglalakbay ay isang makapangyarihang paalala na ang edukasyon ay walang itinakdang panahon. Habang may pangarap, may pagkakataon; habang may determinasyon, may tagumpay.

Tunay na si Nanay Marites Camarillo ay buhay na patunay na hindi hadlang ang edad sa pag-abot ng mga pangarap, at walang huli para sa sinumang handang magsikap upang baguhin ang kanilang kinabukasan.